نصیر آباد: حاجی صدام حسین عمرانی کی قیادت میں پلیانی برادری نے ڈیرہ مراد جمالی میں مراد شاخ پر مبینہ غیر قانونی ڈپ کی تعمیر کے خلاف احتجاجی کیمپ قائم کرکے دھرنا دے دیا اور اعلان کیا ہے کہ ڈپ کی مسماری تک احتجاج جاری رہے گا۔
احتجاجی کیمپ میں شریک پلیانی برادری کے افراد نے مراد شاخ میں تعمیر کیے گئے مبینہ غیر قانونی ڈپ پر تشویش کا اظہار کرتے ہوئے متعلقہ انتظامیہ اور محکمہ آبپاشی کے حکام سے مطالبہ کیا کہ معاملے کا فوری نوٹس لیا جائے، تحقیقات کرکے حقائق سامنے لائے جائیں اور قانون کے مطابق کارروائی عمل میں لائی جائے۔
متعلقہ پوسٹس
حاجی صدام حسین عمرانی کی قیادت میں احتجاج کرنے والے افراد نے کہا کہ مراد شاخ پر مبینہ غیر قانونی تعمیر ان کے لیے باعث تشویش ہے اور اس مسئلے کو جلد حل کرنا ضروری ہے۔ انہوں نے مطالبہ کیا کہ ڈپ کو مسمار کرکے شاخ کی اصل حالت بحال کی جائے۔
پلیانی برادری نے دوٹوک مؤقف اختیار کیا کہ جب تک مبینہ غیر قانونی ڈپ کو مسمار نہیں کیا جاتا، احتجاجی کیمپ اور دھرنا جاری رہے گا۔ شرکاء نے اس عزم کا اظہار کیا کہ وہ اپنے مطالبات کی منظوری اور مسئلے کے مستقل حل تک پُرامن احتجاج جاری رکھیں گے۔
احتجاجی شرکاء نے متعلقہ حکام پر زور دیا کہ معاملے کی غیر جانب دارانہ تحقیقات کرکے حقائق کی روشنی میں ضروری اقدامات کیے جائیں تاکہ تنازع کا منصفانہ اور مستقل حل نکالا جا سکے۔