کوئٹہ، 28 اکتوبر: وزیراعلیٰ بلوچستان میر سرفراز بگٹی کی ہدایت پر صوبائی وزیر صحت بخت محمد کاکڑ اور محکمہ داخلہ کے معاون بابر یوسفزئی نے نوشکی کے گورنمنٹ گرلز ڈگری کالج میں فائرنگ سے زخمی ہونے والی طالبات کی نجی ہسپتال میں عیادت کی۔
صوبائی وزیر صحت بخت محمد کاکڑ نے کہا کہ زخمی طالبات کو بہترین طبی سہولیات فراہم کی جا رہی ہیں اور ان کے علاج معالجے کے تمام اخراجات صوبائی حکومت برداشت کرے گی۔ انہوں نے مشکل حالات میں طالبات کے حوصلے اور بہادری کو سراہتے ہوئے کہا کہ تعلیمی اداروں کو نشانہ بنا کر قوم کے عزم کو کمزور نہیں کیا جا سکتا۔
دوسری جانب صوبائی وزیر داخلہ میر ضیاء اللہ لانگو نے واقعے کا نوٹس لیتے ہوئے متعلقہ حکام سے 24 گھنٹوں میں تفصیلی رپورٹ طلب کر لی ہے۔ انہوں نے رخشان ڈویژن کے تمام تعلیمی اداروں، بالخصوص گرلز کالجز کی سیکیورٹی مزید سخت کرنے کی ہدایت بھی کی ہے۔
متعلقہ پوسٹس
صوبائی حکومت کی فراہم کردہ اطلاعات کے مطابق فائرنگ کے واقعے میں تین طالبات زخمی ہوئیں جبکہ کالج کی املاک کو بھی نقصان پہنچا۔
محکمہ داخلہ کے معاون بابر یوسفزئی نے زخمی طالبات کو ہر ممکن تعاون کی یقین دہانی کراتے ہوئے کہا کہ حملے میں ملوث عناصر اپنے مقاصد میں کامیاب نہیں ہوں گے۔
حکام کو تعلیمی اداروں اور طالبات کے تحفظ کے لیے ضروری حفاظتی اقدامات یقینی بنانے کی ہدایت کی گئی ہے۔