اسلام آباد، 12 اکتوبر: قومی اسمبلی میں قائد حزب اختلاف محمود خان اچکزئی نے کہا ہے کہ پارلیمنٹ ملک میں طاقت کا حقیقی سرچشمہ ہونی چاہیے اور داخلی و خارجی پالیسیوں سمیت تمام اہم قومی معاملات کے فیصلے پارلیمنٹ میں ہونے چاہییں۔ انہوں نے کہا کہ تمام ادارے آئین کے دائرے میں رہتے ہوئے آزادانہ کام کریں، عدلیہ پر کوئی قدغن نہ ہو اور پارلیمنٹ کی بالادستی تسلیم کی جائے۔
پارلیمنٹ ہاؤس کے باہر پریس کانفرنس کرتے ہوئے محمود خان اچکزئی نے 2024 کے عام انتخابات میں مبینہ مداخلت اور زر و زور کے استعمال پر تنقید کی۔ ان کا کہنا تھا کہ پاکستان تحریک انصاف کو عوامی حمایت حاصل تھی اور اب بھی ہے، تاہم پارٹی کو انتخابی نشان سے محرومی اور مختلف پابندیوں کا سامنا کرنا پڑا، جبکہ اس کے بانی عمران خان بھی ان اقدامات سے متاثر ہوئے۔
انہوں نے الزام عائد کیا کہ عوامی مینڈیٹ کو پیسے کے زور پر متاثر کیا گیا اور موجودہ حکومت کی حمایت کرنے والی جماعتوں کو عوام کے سامنے جواب دہ ہونا پڑے گا۔ انہوں نے آئینی ترامیم اور بعض اقدامات کو جمہوری نظام کے لیے نقصان دہ قرار دیا۔
خیبرپختونخوا میں ایمرجنسی یا گورنر راج کے نفاذ کے امکانات پر تبصرہ کرتے ہوئے انہوں نے منتخب صوبائی حکومت کے خلاف ایسے اقدامات کی مخالفت کی۔ انہوں نے بلوچستان کی سیاسی صورتحال کا حوالہ دیتے ہوئے بھی جمہوری طرز عمل کی ضرورت پر زور دیا۔
قائد حزب اختلاف نے آئین کی بالادستی، جمہوریت اور شہری آزادیوں پر یقین رکھنے والی سیاسی جماعتوں اور افراد کو متحد ہونے کی دعوت دی۔ انہوں نے اعلان کیا کہ تحریک تحفظ آئین پاکستان ملک کے مختلف اضلاع میں آئین کے تحفظ کے لیے جمہوری جدوجہد شروع کرے گی۔
متعلقہ پوسٹس
محمود خان اچکزئی نے واضح کیا کہ ان کی تحریک گالی، گولی یا پتھر کے بجائے آئینی اور جمہوری راستہ اختیار کرے گی۔ انہوں نے کہا کہ آئین کی خلاف ورزی کرنے والوں کے خلاف آواز اٹھانا ضروری ہے۔
عمران خان سے ملاقات کے حوالے سے انہوں نے ان کی صحت پر تشویش کا اظہار کرتے ہوئے ملاقات کی اجازت دینے کا مطالبہ کیا۔ انہوں نے کہا کہ ان کی جماعت مذاکرات کے لیے تیار ہے، تاہم موجودہ نظام کے خلاف جمہوری جدوجہد بھی جاری رہے گی۔
انہوں نے کہا کہ مذاکرات کے لیے ایسا قابل قبول راستہ نکالا جائے جس پر عمران خان کو بھی اعتماد ہو۔ ان کے مطابق وزیراعظم ہاؤس، اسپیکر ہاؤس یا کسی دوسرے مناسب مقام پر مذاکرات کیے جا سکتے ہیں۔
محمود خان اچکزئی نے خیبرپختونخوا کے عوام پر زور دیا کہ وہ جمہوری جدوجہد جاری رکھیں۔ انہوں نے پارلیمنٹ کے ارکان کی تقاریر کو آئینی تحفظ دینے اور ان کا آڈیو و ویڈیو ریکارڈ محفوظ رکھنے کی ضرورت پر بھی زور دیا۔
انہوں نے کہا کہ پاکستان کی ترقی اور استحکام کے لیے پارلیمنٹ کو حقیقی معنوں میں طاقت کا سرچشمہ بنانا اور آئین کی بالادستی یقینی بنانا ناگزیر ہے۔