وفاقی وزیر برائے اقتصادی امور سینیٹر احد خان چیمہ نے کہا ہے کہ وزیراعظم کی فیول ریلیف اسکیم ملک بھر میں کامیابی سے جاری ہے اور اس پر عملدرآمد میں پیش رفت ہو رہی ہے۔
اسلام آباد میں وزیراعظم کی فیول ریلیف اسکیم پر عملدرآمد کا جائزہ لینے کے لیے اجلاس کی صدارت کرتے ہوئے وفاقی وزیر نے اسکیم کی موجودہ صورتحال کا جائزہ لیا۔ اجلاس میں وفاقی وزیر اطلاعات و نشریات عطا اللہ تارڑ، وفاقی وزیر پٹرولیم علی پرویز ملک، وفاقی وزیر آئی ٹی شزہ فاطمہ خواجہ، وزیر مملکت برائے خزانہ اور متعلقہ اداروں و صوبائی حکومتوں کے نمائندوں نے شرکت کی۔
وزارت آئی ٹی اور پاکستان ڈیجیٹل اتھارٹی نے اجلاس کو اسکیم پر عملدرآمد کے حوالے سے بریفنگ دی۔ اجلاس کو بتایا گیا کہ اسکیم کے تحت 50 لاکھ سے زائد افراد رجسٹر ہوچکے ہیں جبکہ فیول ٹوکن بھی کامیابی سے جاری کیے جا رہے ہیں۔ بیشتر پٹرول پمپس پر رجسٹریشن سے متعلق مسائل اور دیگر شکایات بھی حل کردی گئی ہیں۔
اجلاس میں رکشہ اور لوڈر مالکان کو درپیش رجسٹریشن کے مسائل کا بھی جائزہ لیا گیا، خصوصاً ان گاڑیوں کے حوالے سے جو صوبائی ایکسائز محکموں میں رجسٹرڈ نہیں ہیں۔ صوبائی نمائندوں نے بتایا کہ رکشوں کی رجسٹریشن شروع کردی گئی ہے۔
حکام کے مطابق گاڑیوں کی رجسٹریشن مکمل ہونے کے بعد اہل مالکان اسکیم سے فائدہ اٹھا سکیں گے، جبکہ رجسٹرڈ موٹر سائیکلوں کے مالکان کو بھی اسکیم کے تحت ریلیف مل رہا ہے۔
متعلقہ پوسٹس
احد چیمہ نے رکشہ اور لوڈر مالکان کو درپیش رجسٹریشن کے مسائل فوری طور پر حل کرنے کی ہدایت کرتے ہوئے کہا کہ اہل افراد کو ریلیف کے عمل سے باہر نہیں رہنا چاہیے۔ انہوں نے پاکستان ڈیجیٹل اتھارٹی کو ہدایت کی کہ گاڑیوں کی رجسٹریشن اور ٹوکن کی ادائیگی سے متعلق شکایات کے لیے ایک خصوصی شکایتی پورٹل جلد فعال کیا جائے۔
پاکستان ڈیجیٹل اتھارٹی نے اجلاس کو یقین دہانی کرائی کہ صارفین کو اپنی شکایات درج کرانے اور ان کے حل کے لیے پورٹل جلد از جلد فعال کرنے پر کام کیا جائے گا۔
وفاقی وزیر نے وزیراعظم کی ہدایت کے مطابق ارکان پارلیمنٹ کی جانب سے اپنے حلقوں کے پٹرول پمپس کے دوروں کا خیرمقدم کیا۔ انہوں نے کہا کہ ان دوروں سے ملنے والی حقیقی وقت کی معلومات اور آراء نظام کو بہتر بنانے میں مدد دے رہی ہیں۔
اجلاس کو بتایا گیا کہ پٹرول پمپس کو زیادہ تر ادائیگیاں کردی گئی ہیں، جبکہ اسٹیٹ بینک کے نمائندوں نے بتایا کہ زیر التوا ادائیگیوں کے مسائل ایک سے دو روز میں حل ہونے کی توقع ہے۔
احد چیمہ نے اس بات پر زور دیا کہ ادائیگیوں میں تاخیر سے اسکیم پر عملدرآمد متاثر نہیں ہونا چاہیے۔ انہوں نے اسکیم پر عملدرآمد میں صوبائی حکومتوں اور ضلعی انتظامیہ کی کارکردگی پر اطمینان کا اظہار کیا۔
وفاقی وزیر اطلاعات و نشریات عطا اللہ تارڑ نے کہا کہ میڈیا اور زمینی سطح پر آگاہی مہم کے ذریعے عوام کو اسکیم سے متعلق معلومات فراہم کرنے کی کوششیں جاری ہیں اور شہریوں کو آگاہ کرنے کے لیے تمام ممکنہ اقدامات کیے جا رہے ہیں۔