لاہور: سندھ سے تعلق رکھنے والے کامن ٹریننگ پروگرام کے زیرِ تربیت افسران نے اپنے مطالعاتی دورے کے دوران سمیڈا کے لاہور دفتر کا دورہ کیا، جہاں انہیں چھوٹے اور درمیانے درجے کے کاروباروں کے فروغ، ادارے کے کردار اور کاروباری سہولتوں کی فراہمی سے متعلق اقدامات پر بریفنگ دی گئی۔
سمیڈا کی جنرل منیجر کارپوریٹ افیئرز صالحہ سعید نے وفد کو ادارے کے دائرۂ کار، ترجیحات اور تین سالہ کاروباری منصوبے کے تحت جاری اہم اقدامات سے آگاہ کیا۔ انہوں نے بتایا کہ سمیڈا ملک بھر میں چھوٹے اور درمیانے درجے کے کاروباروں کی ترقی، مسابقت اور پائیداری کے لیے کام کر رہا ہے۔
متعلقہ پوسٹس
بریفنگ میں چھوٹے کاروباروں کو باقاعدہ قانونی و تجارتی دائرے میں لانے، مالی وسائل تک رسائی بہتر بنانے، برآمدات کے لیے تیاری، خواتین کی کاروباری سرگرمیوں، چھوٹے کاروباری اداروں کی ترقی اور ماحولیاتی تبدیلی سے متعلق اقدامات پر روشنی ڈالی گئی۔
زیرِ تربیت افسران کو کاروباری افراد کی معاونت، کاروباری نظام کو مضبوط بنانے اور معاشی ترقی کے لیے سازگار ماحول کی فراہمی میں سمیڈا کے کردار سے بھی آگاہ کیا گیا۔ وفد نے ادارے کی کوششوں کو سراہتے ہوئے کہا کہ ایسے اقدامات کاروباری مواقع بڑھانے اور ملکی معیشت کو مضبوط بنانے میں اہم کردار ادا کرتے ہیں۔
یہ دورہ افسران کی تربیتی سرگرمیوں کا حصہ تھا، جس کا مقصد انہیں سرکاری اداروں کے عملی طریقۂ کار، ذمہ داریوں اور ترقیاتی کردار سے متعلق آگاہی فراہم کرنا تھا۔