اینٹی نارکوٹکس فورس نے ملک کے مختلف شہروں میں منشیات اسمگلنگ کے خلاف سات کارروائیاں کرتے ہوئے 12 ملزمان کو گرفتار کرلیا اور ایک کروڑ 42 لاکھ روپے سے زائد مالیت کی 91.562 کلوگرام منشیات برآمد کرلی۔
اسلام آباد ایئرپورٹ پر جدہ جانے والے مسافر کے بیگ سے 362 گرام آئس برآمد کرکے ملزم کو گرفتار کرلیا گیا۔ خانوزئی، ضلع پشین کے قریب ایک ٹرک سے 72 کلوگرام چرس برآمد کرکے ملزم کو گرفتار کیا گیا۔
متعلقہ پوسٹس
پشاور میں یونیورسٹی روڈ کے قریب گاڑی سے 10.8 کلوگرام افیون برآمد کرکے تین ملزمان کو گرفتار کیا گیا۔ لاہور میں راوی ٹول پلازہ کے قریب گاڑی سے 5.4 کلوگرام ہیروئن برآمد کرکے تین ملزمان گرفتار کیے گئے۔
جامشورو ٹول پلازہ کے قریب گاڑی سے 1.3 کلوگرام آئس برآمد کرکے دو ملزمان کو گرفتار کیا گیا۔ اسلام آباد ٹول پلازہ کے قریب ایک ملزم کے قبضے سے 1.2 کلوگرام چرس جبکہ سکھر میں ایئرپورٹ روڈ کے قریب ایک ملزم کے قبضے سے 500 گرام چرس برآمد کی گئی۔
اے این ایف کے مطابق تمام مقدمات انسدادِ منشیات ایکٹ 1997 کے تحت درج کرکے مزید تحقیقات شروع کردی گئی ہیں۔