شنگھائی، 25 ستمبر 2026ء: 48ویں ورلڈ اسکلز مقابلے میں پاکستان نے پہلی بار شرکت کرتے ہوئے کھانا پکانے، بجلی کی تنصیب اور گرافک ڈیزائن سمیت مختلف فنی شعبوں میں اپنی نوجوان صلاحیتوں کو دنیا کے سامنے پیش کیا ہے، جبکہ پاکستانی مقابلہ کنندگان نے فنی مہارت کے ساتھ ملک کی ثقافت اور روایات کی بھی نمائندگی کی۔
شنگھائی میں جاری عالمی مقابلے میں کھانا پکانے کے شعبے میں پاکستان کی نمائندگی کرنے والے محید محبوب نے کہا کہ پاکستانی کھانے اپنے منفرد ذائقوں اور مصالحوں کے ذریعے ملک کی ثقافت کو دنیا تک پہنچانے کا مؤثر ذریعہ ہیں۔
محید محبوب، جو کالج آف ٹورزم اینڈ ہوٹل مینجمنٹ کے طالب علم ہیں، نے بتایا کہ مقابلے کی تیاری کے لیے انہوں نے چھ ماہ تک مسلسل تربیت حاصل کی اور جرمن ماہرین سے رہنمائی بھی حاصل کی۔ ان کے مطابق پاکستانی ٹیم نے عالمی مقابلے کے لیے بھرپور تیاری کی ہے۔
انہوں نے کہا کہ گرم مصالحہ پاکستانی کھانوں کی نمایاں پہچان ہے اور اسے کڑاہی، بریانی سمیت متعدد روایتی پکوانوں میں استعمال کیا جاتا ہے۔ ان کا کہنا تھا کہ عالمی معیار کے مطابق کھانا تیار کرتے ہوئے پاکستانی کھانوں کی منفرد شناخت برقرار رکھنا ایک چیلنج ضرور ہے، تاہم مخصوص مصالحے اس ثقافتی شناخت کو برقرار رکھنے میں اہم کردار ادا کرتے ہیں۔
محید محبوب نے چین میں اپنے تجربے کو خوشگوار قرار دیتے ہوئے چینی کھانوں کو سراہا اور شنگھائی کو جدید شہر قرار دیا۔ انہوں نے امید ظاہر کی کہ پاکستان اور چین کے دوستانہ تعلقات فنی اور پیشہ ورانہ تعلیم و تربیت کے شعبے میں مزید تعاون کا باعث بنیں گے۔
متعلقہ پوسٹس
وزیراعظم یوتھ پروگرام کے مطابق جنوری 2026ء میں شروع کیے گئے پاکستان چین فنی و پیشہ ورانہ تعلیم و تربیت کے نئے منصوبے کے تحت پانچ سال کے دوران 50 ہزار سے زائد پاکستانی نوجوانوں کو تربیت دینے اور تقریباً 2 ہزار ماسٹر ٹرینرز تیار کرنے کا ہدف مقرر کیا گیا ہے۔
دریں اثنا، بجلی کی تنصیب کے شعبے میں پاکستان کی نمائندگی کرنے والے مدثر حسین نے کہا کہ شنگھائی میں جدید ٹیکنالوجی اور کام کے جدید طریقوں کا مشاہدہ پاکستانی نوجوانوں کو مستقبل کے عالمی مقابلوں کے لیے بہتر تیاری میں مدد دے سکتا ہے۔
گورنمنٹ کالج آف ٹیکنالوجی ساہیوال کے طالب علم مدثر حسین نے کہا کہ تکنیکی خاکہ سازی، کیبلز کی درست تنصیب، وائرنگ، آٹومیشن نظام اور عالمی معیار کے مطابق تنصیب ایسے اہم شعبے ہیں جن پر مستقبل کے پاکستانی مقابلہ کنندگان کو خصوصی توجہ دینی چاہیے۔ انہوں نے کہا کہ وہ وطن واپسی پر شنگھائی میں حاصل ہونے والا تجربہ دیگر پاکستانی نوجوانوں تک منتقل کریں گے۔
مدثر حسین کے مطابق بجلی کے کام میں ان کی دلچسپی اسکول کے زمانے میں پیدا ہوئی، جب وہ اپنے گاؤں کی ایک چھوٹی دکان پر الیکٹریشنز کو کام کرتے دیکھتے تھے۔ بعد ازاں انہوں نے ورلڈ اسکلز پاکستان کے انتخابی مراحل میں ضلعی سطح سے قومی مقابلے تک حصہ لیا اور شنگھائی کے عالمی مقابلے کے لیے منتخب ہوئے۔
ورلڈ اسکلز مقابلہ دنیا کے بڑے فنی مہارت کے مقابلوں میں شمار ہوتا ہے۔ رواں مقابلے میں 68 ممالک اور خطوں سے تعلق رکھنے والے ایک ہزار 385 نوجوان ماہرین 22 سے 27 ستمبر تک شنگھائی میں 64 مختلف فنی شعبوں میں اپنی صلاحیتوں کا مظاہرہ کر رہے ہیں۔