کراچی، 29 اگست: پاکستان کے بڑے مربوط مارکیٹنگ اور ابلاغی اداروں میں شامل سائینرجی گروپ نے ڈریگنز آف پاکستان 2026 ایوارڈز میں مختلف شعبوں میں سات اعزازات حاصل کر لیے۔ مقابلے میں پاکستانی تخلیقی مہمات کا جائزہ ملک سے باہر موجود بین الاقوامی ماہرین پر مشتمل غیر جانب دار اور میرٹ پر مبنی جیوری نے لیا۔
گروپ کے ذیلی اداروں سائینرجی ایڈورٹائزنگ اور سائنائٹ ڈیجیٹل نے بالترتیب پاکستان اسٹیٹ آئل اور کے ایف سی پاکستان کے لیے تیار کی گئی مہمات پر مجموعی طور پر تین گولڈ، دو سلور اور دو برونز ڈریگنز حاصل کیے۔
سائینرجی ایڈورٹائزنگ نے پاکستان اسٹیٹ آئل کی مہمات کے لیے پانچ اعزازات جیتے۔ ”حفاظت بچپن سے“ مہم کو گولڈ ڈریگن، ”میڈ اِن پاکستان“ مہم کو ایک گولڈ اور ایک برونز، جبکہ ”بلیز ایکسٹریم“ مہم کو ایک سلور اور ایک برونز ڈریگن ملا۔
متعلقہ پوسٹس
سائنائٹ ڈیجیٹل نے کے ایف سی پاکستان کی ”چیمپئنز ڈیل“ مہم کے لیے گولڈ جبکہ ”ہاٹ شاٹ شیکرز“ مہم کے لیے سلور ڈریگن حاصل کیا۔
سائینرجی گروپ کے چیئرمین اور چیف ایگزیکٹو احمد کپاڈیا نے کہا کہ یہ اعزازات پاکستانی تخلیقی صلاحیتوں پر اعتماد کا اظہار ہیں اور ثابت کرتے ہیں کہ مقامی ثقافت اور زمینی حقائق سے جڑی مؤثر تخلیقی سوچ عالمی سطح پر بھی نمایاں مقام حاصل کر سکتی ہے۔
انہوں نے کہا کہ تخلیقی کام کا مقصد صرف پیغام پہنچانا نہیں بلکہ لوگوں کو متاثر کرنا، برانڈز کو مضبوط بنانا اور مؤثر نتائج پیدا کرنا بھی ہے۔
1999 میں قائم ہونے والے سائینرجی گروپ نے ملکی اور بین الاقوامی سطح کے اہم صنعتی پلیٹ فارمز پر مسلسل کامیابیاں حاصل کی ہیں۔