وزیراعلیٰ بلوچستان میر سرفراز بگٹی کی ہدایت پر ضلع قلات میں کسانوں کی زرعی ترقی اور خوشحالی کے لیے مقامی زمینداروں میں مکئی کے چارے کے تصدیق شدہ اور اعلیٰ معیار کے بیج مفت تقسیم کیے گئے۔
یہ اقدام ریوائیول آف بلوچستان آبی وسائل پروگرام کے تحت کیا گیا، جسے یورپی یونین کی مالی معاونت حاصل ہے اور اقوام متحدہ کے فوڈ اینڈ ایگریکلچر آرگنائزیشن کے زیر اہتمام اس حوالے سے تقریب منعقد ہوئی۔
متعلقہ پوسٹس
تقریب میں محکمہ زراعت کے افسران، زمینداروں اور کسانوں نے شرکت کی۔ ڈپٹی ڈائریکٹر ایگریکلچر واٹر مینجمنٹ شکیل احمد زہری، ڈپٹی ڈائریکٹر زراعت توسیع عبدالناصر مینگل، ڈائریکٹر آئل اینڈ سیڈ محمد یحییٰ بلوچ اور دیگر افسران نے کسانوں میں بیج کے تھیلے تقسیم کیے۔
حکام کے مطابق پروگرام کا مقصد معیاری بیج کی فراہمی، پانی کے تحفظ کو فروغ دینا اور فصلوں کی پیداوار میں اضافہ کرنا ہے۔
زمینداروں نے بیج اور دیگر زرعی سامان کی بروقت فراہمی کی ضرورت پر زور دیا۔ محکمہ زراعت کے افسران نے ان کے سوالات کے جواب دیتے ہوئے بروقت بیج کی فراہمی کے لیے تعاون کی یقین دہانی کرائی۔