اسلام آباد، 27 ستمبر 2026ء: وزیراعظم شہباز شریف نے کہا ہے کہ حکومت ملک بھر میں سیاحت کے فروغ، سیاحتی انفراسٹرکچر کی بہتری اور اس شعبے سے وابستہ مقامی آبادیوں اور نوجوانوں کے لیے روزگار اور ترقی کے مواقع پیدا کرنے کے لیے فعال اقدامات کر رہی ہے۔
عالمی یوم سیاحت کے موقع پر اپنے پیغام میں وزیراعظم نے پاکستان اور دنیا بھر کے سیاحوں اور سیاحت کے شعبے سے وابستہ تمام افراد کو خراج تحسین پیش کرتے ہوئے ان کے جذبہ جستجو، تجسس اور دریافت کو سراہا۔
شہباز شریف نے کہا کہ دلکش قدرتی مناظر، قدیم تاریخی آثار، شاندار تہذیبی ورثہ اور متنوع ثقافتی روایات سیاحت کے اہم مراکز میں شامل ہیں۔ پاکستان غیر معمولی قدرتی حسن، مالا مال ثقافتی و تہذیبی ورثے اور متعدد تاریخی و مذہبی مقامات سے مالا مال ہے، جو سیاحت کے فروغ کے لیے وسیع مواقع فراہم کرتے ہیں۔
وزیراعظم نے کہا کہ حکومت سیاحتی انفراسٹرکچر کو مضبوط بنانے اور مقامی آبادیوں اور نوجوانوں کے لیے روزگار سمیت معاشی و سماجی مواقع پیدا کرنے کے لیے کام کر رہی ہے۔ حکومت پاکستان کو ایک محفوظ، پرکشش اور مسابقتی سیاحتی منزل کے طور پر دنیا کے سامنے پیش کرنے کے لیے پرعزم ہے۔
متعلقہ پوسٹس
انہوں نے کہا کہ پاکستان کا معتدل موسم، دلکش پہاڑی مناظر اور خوبصورت وادیاں دنیا بھر سے سیاحوں کو متوجہ کرنے کی بھرپور صلاحیت رکھتی ہیں۔
شہباز شریف نے کہا کہ پاکستان ہزاروں سال پرانی تہذیبوں، جن میں وادی سندھ اور گندھارا تہذیبیں شامل ہیں، کا مسکن ہے اور یہاں مالا مال ثقافتی ورثہ بھی موجود ہے۔ ملک میں سکھ مت، بدھ مت اور دیگر مذاہب کے پیروکاروں کے لیے تاریخی اہمیت کے حامل مقدس مقامات بھی موجود ہیں، جو مذہبی سیاحت کے فروغ کے مواقع فراہم کرتے ہیں۔
وزیراعظم نے کہا کہ سیاحت کا فروغ معاشی ترقی میں کردار ادا کرنے کے ساتھ ساتھ مختلف ممالک کے درمیان تعلقات کو مضبوط بنانے میں بھی معاون ثابت ہو سکتا ہے۔ انفرادی سطح پر مختلف ثقافتوں سے آگاہی انسان کے نقطہ نظر کو وسیع کرتی ہے اور اس کی صلاحیتوں کو نکھارنے میں مدد دیتی ہے۔
انہوں نے مزید کہا کہ سیاحت اور تفریح کا فروغ صحت مند ذہن، مثبت سرگرمیوں اور متوازن طرز زندگی کے فروغ کے عزم کی عکاسی کرتا ہے۔