وزیر اعلیٰ بلوچستان میر سرفراز بگٹی اور وزیر اعلیٰ کے معاون برائے اطلاعات و سیاسی امور شاہد رند نے ضلع کوئٹہ کے علاقے شعبان میں دہشت گردوں کے خلاف سیکیورٹی فورسز کی کارروائی کو سراہا ہے۔
وزیر اعلیٰ بلوچستان کے مطابق شعبان میں کارروائی کے دوران 13 دہشت گرد ہلاک ہوئے جبکہ متعدد ٹھکانوں کو کلیئر کیا گیا اور وہاں سے اسلحہ، گولہ بارود اور دھماکا خیز مواد برآمد ہوا۔
متعلقہ پوسٹس
شاہد رند نے کہا کہ کارروائی مؤثر انٹیلی جنس معلومات کی بنیاد پر کی گئی، جبکہ مقامی آبادی کے تحفظ اور علاقے کو دہشت گردوں سے پاک کرنے کے لیے کارروائیاں قابلِ تحسین ہیں۔
دریں اثنا کیچ اور کوئٹہ ویسٹ میں انٹیلی جنس بنیادوں پر کی گئی کارروائیوں کے دوران مزید 6 دہشت گردوں کے ہلاک ہونے کی اطلاع دی گئی ہے۔
وزیر اعلیٰ اور معاون وزیر اعلیٰ نے فائرنگ کے تبادلے میں شہید ہونے والے صوبیدار محمد جمیل کو خراجِ عقیدت پیش کرتے ہوئے کہا کہ دہشت گردی کے خلاف جنگ میں سیکیورٹی فورسز اور قانون نافذ کرنے والے اداروں کی قربانیاں قابلِ قدر ہیں۔ انہوں نے کہا کہ دہشت گردی کے خاتمے کے لیے کارروائیاں جاری رہیں گی۔